କର୍ତ୍ତବ୍ୟ ଆଗରେ ହାରିଗଲା ଜୀବନ I ନିଜ ଜୀବନକୁ ଖାତିର ନକରି କର୍ତ୍ତବ୍ୟ ପଥେ ଆଗେଇ ସାମ୍ବାଦିକ ଅରିନ୍ଦମ୍ ଦାସଙ୍କ ପରଲୋକ ହୋଇଛି । ଓଟିଭି ର ଚିଫ୍ ରିପୋର୍ଟର ଥିଲେ ଅରିନ୍ଦମ। ହାତୀ ଉଦ୍ଧାରର ଖବର ଆପଣଙ୍କ ପାଖରେ ପହଞ୍ଚାଉଥିବା ଅରିନ୍ଦମ ହଠାତ୍ ଆମ ସମସ୍ତଙ୍କୁ ଛାଡି ଚାଲିଯିବେ ଏହା ସହଜରେ ବିଶ୍ବାସ କରି ହେଉନାହିଁ । ଖବର ପରିବେଷଣ ପାଇଁ ପାଣି ସୁଅରେ ନିଜକୁ ଠିଆ କରିଥିବା ଅରିନ୍ଦମ ଏ ଦୁନିଆଁ ଛାଡି ଚାଲି ଯାଇଛନ୍ତି I ଆଜି ଅରିନ୍ଦମ ଙ୍କୁ ଝୁରୁଛି ସାରା ଦେଶ ସାରା ଓଡିଶା
I ମନେ ପଡିଯାଉଛି ତାଙ୍କର ସେହି ଦୁଃସାହସିକ ରିପୋଟିଂର ଝଲକ I ଆଜି ହାତୀକୁ ଉଦ୍ଧାର ବେଳେ ଓଡ୍ରାଫ ବୋଟ୍ରେ ନିଜ କ୍ୟାମେରାମ୍ୟାନଙ୍କ ସହ ଭରା ନଈକୁ ଯାଇଥିଲେ ଅରିନ୍ଦମ। ଅଚାନକ ନଈର ଗଭୀର ସୁଅରେ ଓଲଟି ପଡିଥିଲା ଓଡ୍ରାଫ୍ ବୋଟ୍ । ସଙ୍ଗେ ସଙ୍ଗେ ଉଦ୍ଧାର ପାଇଁ ପୋଲ ଉପରେ ରହିଥିବା ମତ୍ସଜୀବୀମାନେ ଦଉଡି ବଢାଇଥିଲେ। କିଛି ଓଡ୍ରାଫ୍ କର୍ମଚାରୀ ଦଉଡି ସହାୟତାରେ ଉଦ୍ଧାର ହୋଇଥିଲେ ମଧ୍ୟ ନିଜକୁ ରକ୍ଷା କରି ପାରି ନ ଥିଲେ ଅରିନ୍ଦମ I ବହୁ ସମୟ ଧରି ଅକ୍ଲାନ୍ତ ପରିଶ୍ରମ ପରେ ଉଭୟଙ୍କୁ ଉଦ୍ଧାର କରି କଟକ ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ହେଲେ ସେତେବେଳକୁ ଅରିନ୍ଦମ ଆମ ସମସ୍ତଙ୍କୁ ଏକାକୀ ଛାଡି ଚାଲି ଯାଇଥିଲେ । ତାଙ୍କ ସହ ଥିବା କ୍ୟାମେରାମ୍ୟାନ୍ ପ୍ରଭାତ ବିଶୋଇଙ୍କ ସ୍ବାସ୍ଥ୍ୟବସ୍ଥା ଗୁରୁତର ରହିଥିବା ଜଣାଯାଇଛି । ତାଙ୍କୁ ମଧ୍ୟ କଟକ ବଡ ମେଡିକାଲରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି । ସତରେ ଅରିନ୍ଦମଙ୍କ ବଳିଦାନ ଅତୁଳନୀୟ ଅଟେ I ତାଙ୍କ ବିୟୋଗ ଓଡିଶା ପାଇଁ ଏକ ଅପୂରଣୀୟ କ୍ଷତି ଅଟେ I ଆଜି ତାଙ୍କୁ ଝୁରୁଛନ୍ତି ସାରା ଓଡ଼ିଶାବାସୀ I
