ଏଥର ମନ୍ତ୍ରୀ ନିରଞ୍ଜନ ପୂଜାରୀଙ୍କୁ ମାତ ଦେବା ପାଇଁ ଅଣ୍ଟା ଭିଡ଼ିଛନ୍ତି ନାରୀ ନେତ୍ରୀ ସୋନାଲି ବିଶି I ଚାଷୀଙ୍କ ହକ ର ଲଢେଇରେ ନିଜକୁ ସାମିଲ କରି ବିଧାନସଭାକୁ ଯାଇ ଚାଷୀଙ୍କ ପାଇଁ ସ୍ୱର ଉତ୍ତୋଳନ କରିବାକୁ ରାଜରାସ୍ତାକୁ ଓଲ୍ହାଇଛନ୍ତି ସୋନାଲି ବିଶି I ନିର୍ବାଚନ ଲଢ଼ିବା ପାଇଁ ଲୋକଙ୍କ ଠାରୁ ସାହାଯ୍ୟ ଭିକ୍ଷା କରିଛନ୍ତି ସୋନାଲି ବିଶି I ଆଜି ଅଭିନବ ଉପାୟରେ ନିଜର ନାମାଙ୍କନ ପତ୍ର ଦାଖଲ କରିଛନ୍ତି ସୋନାଲି I ଚାଷୀଙ୍କ ପାରମ୍ପରିକ ଶଗଡ଼ ଗାଡ଼ିରେ ଛିଡା ହୋଇ ସୋନପୁର ରୟାଲ ପଡିଆ ଠାରୁ ଦଳବଳ ସହ ଏକ ରେଲିରେ ବାହାରି ଥିଲେ I ରେଲିରେ ବାହାରି ସମୟରେ ରାସ୍ତାରେ ଆମ୍ବେଦକର ଙ୍କ ପ୍ରତିମୂର୍ତୀରେ ପୁଷ୍ପମାଲ୍ୟ ଅର୍ପଣ କଲାପରେ ଉପ ଜିଲ୍ଲାପାଳଙ୍କ କର୍ୟାଳୟକୁ ପହଞ୍ଚିଥିଲେ । ସେଠାରେ ନିଜ ପଣତରେ ନାମାଙ୍କନ ଖର୍ଚ୍ଚ ପାଇଁ ଲୋକଙ୍କ ଠାରୁ ସହାୟତା ରାଶି ମାଗିଥିଲେ । ଚାଷୀଙ୍କ ସହ ସାଧାରଣ ଲୋକ ଯିଏ ଯାହା ପାରିଲା ତାଙ୍କୁ ସହାୟତା ମଧ୍ୟ ଦେଇଥିଲେ । ଏହି ଟଙ୍କାରେ ଆଜି ନାମାଙ୍କନ ଦାଖଲ କରିବା ସହିତ ଆଗାମୀ ଦିନରେ ଚାଷୀମାନଙ୍କ ଆଶୀର୍ବାଦରେ ବିଜୟୀ ହେବାର ସେ ଆଶା ରଖିବା ସହିତ ଚାଷୀଙ୍କ ପାଇଁ ସଂଘର୍ଷ ଜାରି ରହିବ ବୋଲି ପ୍ରତିକ୍ରିୟା ଦେଇଛନ୍ତି ।
