ତରଭା : ଗାଡି ଚେକିଙ୍ଗ ସମୟରେ ପୋଲିସ କର୍ମୀଚାରୀଙ୍କ ଉପରେ ବାଇକ ଚଢାଇ ଦେଲେ ଚାଳକ। ପ୍ରାପ୍ତ ସୂଚନା ମୁତାବକ ବୁଧବାର ସନ୍ଧ୍ୟା ପ୍ରାୟ ୭ ଘଣ୍ଟା ସମୟରେ ତରଭା ଥାନା ଅଧୀନସ୍ଥ କମସରା ଫାଣ୍ଡି ଅଧିକାରୀ ଅରକ୍ଷିତ ମାଝୀ କିଛି ପୋଲିସ କର୍ମୀଙ୍କ ସହ ପାଣ୍ଡକିଟାଲ ଗ୍ରାମ ନିକଟରେ ଗାଡି ଚେକିଙ୍ଗ କରୁଥିବା ସମୟରେ ଦ୍ରୁତ ଗତିରେ ଆସୁଥିବା ଏକ ବାଇକ ପୋଲିସ କର୍ମଚାରୀ ସୁରେଶ ଚନ୍ଦ୍ର ସା ଙ୍କ ଉପରେ ମାଡ଼ି ଯାଇଥିଲା। ମିଳିଥିବା ସୂଚନା ଅନୁଯାୟୀ ପୋଲିସ କର୍ମଚାରୀ ଜଣକ ଗାଡି ଗୁଡିକୁ ଅଟକାଇବା ପାଇଁ ରାସ୍ତା ଉପରେ ଛିଡା ହୋଇ ହାତ ମାରୁଥିଲେ। କିନ୍ତୁ ଦ୍ରୁତ ଗତିରେ ଆସୁଥିବା ବାଇକ ଭାରସାମ୍ୟ ହରାଇ ପୋଲିସ କର୍ମଚାରୀଙ୍କ ଉପରେ ମାଡି ଯାଇଥିଲା। ଫଳରେ ତାଙ୍କର ଡାହାଣ ଗୋଡ଼ ଭାଙ୍ଗିଯାଇଥିବା ସହ ଶରୀରର ବିଭିନ୍ନ ସ୍ଥାନରେ ଗଭୀର ଆହତ ଲାଗିଛି। ପ୍ରଥମେ ଗୁରୁତ୍ୱର ଅବସ୍ଥାରେ ତାଙ୍କୁ ତରଭା ଡାକ୍ତରଖାନା କୁ ଅଣାଯାଇଥିଲା କିନ୍ତୁ ତାଙ୍କ ଅବସ୍ଥା ଗୁରୁତ୍ୱ ଥିବାରୁ ପ୍ରାଥମିକ ଚିକିତ୍ସା ପରେ ତାଙ୍କୁ ନିକଟସ୍ଥ ବଲାଙ୍ଗୀର ଭୀମଭୋଇ ମେଡିକାଲ କୁ ପଠାଯାଇଛି। ଉକ୍ତ ବାଇକ ଚାଳକ ସୁବର୍ଣପୁର ଜିଲ୍ଲା ରାମପୁର ନିକଟସ୍ଥ ବଡ଼କରଲେ ଗ୍ରାମର ଦୟାସାଗର ବାଘ ବୋଲି ପୋଲିସ ସୁତ୍ର ରୁ ଜଣା ଯାଇଛି। ତେବେ ବାଇକ ଚାଳକ ସାମାନ୍ୟ ଆହତ ହୋଇଥିବା ବେଳେ ପୋଲିସ ବାଇକ (ଓଡ଼ି ୩୧ ଡି ୯୩୪୭) କୁ ଜବତ କରିଛି ।
