ବଲାଙ୍ଗୀର,୨୪/୭ : ସାଉଁନ୍ତପୁର ମଦ ଭାଟିରେ ଚୋରି ଘଟଣାରେ ପୁଲିସକୁ ମିଳିଛି ସଫଳତା । ଉକ୍ତ ଘଟଣାରେ ପୋଲିସ ଦୁଇ ଜଣ ଅଭିଯୁକ୍ତ କୁ ଗିରଫ କରିବା ସହ ସେମାନଙ୍କ ପାଖରୁ ଲକ୍ଷାଧିକ ଟଙ୍କା ଓ ସୁନା ଗହଣା ଜବତ କରିବା ସହ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରିଛି । ପ୍ରାପ୍ତ ସୂଚନା ମୁତାବକ ଗତ ୨୨ ତାରିଖ ରାତିରେ ସାଉଁନ୍ତପୁର ଭାଟିରୁ ନଗଦ ୩ ଲକ୍ଷ ୭୮ ହଜାର ୩ଶହ ଟଙ୍କା ଦୁର୍ବୃତ୍ତ ମାନେ ଚୋରି କରି ନେଇଥିଲେ । ଭାଟି ମ୍ୟାନେଜର ଏ ନେଇ ପୁଇଁତଲା ଥାନାରେ ଲିଖିତ ଅଭିଯୋଗ କରିଥିଲେ I ଅଭିଯୋଗ ଆଧାରରେ ପୋଲିସ କେସ ନଂ ୨୫୪/୨୪ ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ଉକ୍ତ ଘଟଣାରେ ବୁଧବାର ପୋଲିସ ୨ ଜଣ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଥିଲା I ଗିରଫ ଅଭିଯୁକ୍ତ ମାନେ ହେଲେ ଗାଇସିଲେଟ ଥାନା ଅନ୍ତର୍ଗତ ସନ୍ଧିବାହାଲ ଗ୍ରାମର ସୁନିଲ ମିର୍ଧା ଏବଂ ତାଙ୍କୁ ନେବା ଆଣିବାରେ ସାହାଯ୍ୟ କରିଥିବା ସହଯୋଗୀ ନିତିୟାନନ୍ଦ ସାହୁ I ସେମାନଙ୍କ ଠାରୁ ନଗଦ ୨ ଲକ୍ଷ ୮୭ ହଜାର ୩୪୦ ଟଙ୍କା ଓ ଲୁଟ ଟଙ୍କାରେ କିଣା ହୋଇଥିବା ୧ ଲକ୍ଷ ୧୪ ହଜାର ଆଠଶହ ଟଙ୍କାର ସୁନା ଜବତ ହୋଇଥିବା ଜଣାଯାଇଛି । ତେବେ ପୋଲିସ ଉଭୟ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିବା ସଦର ଏସଡିପିଓ ପ୍ରଦିପ ସାହୁ ଏକ ସାମ୍ବାଦିକ ସମ୍ବଳିନୀରେ ସୂଚନା ପ୍ରଦାନ କରିଛନ୍ତି ।
